Старшыня раённага выканаўчага камітэта Мікалай Ірынархавіч Баговіч напярэдадні свята Вялікай Перамогі наведаў дома найстарэйшага ветэрана Вялікай Айчыннай вайны, які зараз пражывае ў нашым раёне, Івана Аляксандравіча Грэхава. Ён ў хуткім часе адзначыць свой стогадовы юбілей. Нарадзіўся і вырас Іван Аляксандравіч у Яраслаўскай вобласці. З пачаткам вайны ён прызваўся на фронт. Ваяваць давялося ў розных мясцінах былога СССР. У Прыбалтыцы пасябраваў з салдатам Савеліем Янушкевічам, які быў родам з нашай мясцовасці. Таму пасля заканчэння вайны саслужывец прапанаваў Івану перабрацца на яго малую радзіму. Тым больш, што нікога з родных у Івана на Яраслаўшчыне не засталося. Так і пражыў усё жыццё ветэран у нашай мясцовасці. Тут ён ажаніўся, выгадаваў дзяцей. Шчыра і сумленна працаваў у калгасе, затым на камбінаце будаўнічых матэрыялаў у гарадскім пасёлку. На жаль, адышлі ў іншы свет і яго спадарожніца жыцця, і дзеці. Зараз ветэран пражывае ў сям’і сваёй нявесткі. Прыемнай нагодай для візіту кіраўніка раёна стала ўручэнне ім Ганаровай граматы Віцебскага абласнога выканаўчага камітэта Івану Аляксандравічу Грэхаву за шматгадовую добрасумленную працу і ў сувязі з 70-годдзем Вялікай Перамогі. Ветэран атрымаў таксама падарункі ад тэрытарыяльная цэнтра сацыяльнага абслугоўвання насельніцтва, ААТ «Жвіранка» і гандлёвай сеткі «Еўраопт». 

Сяргей РАЙЧОНАК.