24 июля 2024

Старшыня Палаты прадстаўнікоў, упаўнаважаны прадстаўнік кіраўніка дзяржавы ў Віцебскай вобласці Ігар Сергяенка наведаў з рабочым візітам Шаркаўшчынскі раён

Старшыня Палаты прадстаўнікоў, упаўнаважаны прадстаўнік кіраўніка дзяржавы ў Віцебскай вобласці Ігар Сергяенка ў адпаведнасці з даручэннем Прэзідэнта Беларусі Аляксандра Лукашэнкі ажыццявіў рабочую паездку і азнаёміўся з ходам жніва ў Віцебскай вобласці.

Шаркаўшчынскія аграрыі сустрэлі Ігара Сергяенку на палетках КУВСП імя Маркава. Чатыры зернеўборачныя камбайны абмалочвалі 40-гектарнае поле з азімай пшаніцай у аддзяленні «Рассвет». Ігар Сергяенка пацікавіўся станам тэхнікі, магчымымі яе паломкамі, месцаразмяшчэннем камбайнаў у начны час, харчаваннем механізатараў.

Ва ўрочышчы Будаўскі паварот уборку азімай пшаніцы вялі аграрыі ААТ «Жвіранка». У полі працавалі сем камбайнаў, за кожным з якіх для адвозу зерня замацавана транспартная адзінка. На 70-гектарным палетку сёлета вырасла выдатная пшаніца. Зерневая культура тут дала звыш 35 цэнтнераў на круг.

Старшыня Палаты прадстаўнікоў уласна ўпэўніўся, што затрымак ва ўборцы зерневых у гаспадарцы няма, усе службы працуюць зладжана і эфектыўна. Кіраўніцтва, спецыялісты сярэдняга звяна, механізатары сумленна адносяцца да сваёй работы, ад якой залежыць харчовая бяспека краіны.

Дарэчы, на жніўным палетку працаваў адзін з вопытных механізатараў Сяргей Курэц на камбайне «Палессе» КЗС-10, які эксплуатуецца ўжо 18 год. Ігар Сергяенка скарыстаў магчымасць і разам з камбайнерам праехаў у кабіне. Ён падкрэсліў, што айчынная тэхніка ва ўмелых механізатарскіх руках ні ў чым не саступае замежнай, а нават і пераўзыходзіць яе.

Па стане на 24 ліпеня ў гаспадарках Шаркаўшчынскага раёна зерневыя і зернебабовыя культуры ўбраны на плошчы 3315 гектараў, што складае 25 працэнтаў ад запланаванага. Намалочана 6113 тон зерня пры сярэдняй ураджайнасці 18,4 цэнтнера з гектара. Надвор’е спрыяе мясцовым аграрыям, тэмпы ўборачнай кампаніі з кожным днём павялічваюцца.

Сяргей РАЙЧОНАК