30.11.2020

Валанцёры раённага аб'яднання Беларускага таварыства Чырвонага Крыжа дапамагаюць пажылым людзям

З мэтай прафілактыкі распаўсюджвання інфекцыі, выкліканай каранавiрусам COVID-19, адзінокім і адзінока пражываючым пажылым людзям і інвалідам, якія знаходзяцца ў групе асаблівай рызыкі, рэкамендавана мінімізаваць наведванне месцаў масавага збору людзей. У сувязі з гэтым валанцёры раённага аб'яднання Беларускага таварыства Чырвонага Крыжа арганізавалі дастаўку прадуктаў харчавання, тавараў першай неабходнасці і лекаў, а таксама рэцэптаў на неабходныя медпрэпараты. Для гэтага пацыентам з хранічнымі захворваннямі, якія маюць патрэбу ў рэцэптах  на лекі для пастаяннага прыёму, раней прызначаных лекарам, трэба патэлефанаваць у рэгістратуру паліклінікі і пакінуць свае кантакты. З імі звяжацца медработнік, які арганізуе выпіску і дастаўку рэцэптаў на дом.

У нашым раёне ў склад валанцёрскай групы ўваходзяць сацыяльныя работнікі, а таксама валанцёры раённых арганізацый Беларускага таварыства Чырвонага Крыжа і БРСМ. Звярнуўшыся ў ТЦСАН, адзінокія пажылыя грамадзяне і інваліды па тэлефоне пакідаюць заяўку. Пасля гэтага іх наведвае валанцёр, які ўдакладняе пералік неабходных тавараў або лекаў, атрымлівае ў  звярнуўшагася грамадзяніна грашовыя сродкі на куплю тавараў. Затым усё дастаўляецца валанцёрамі заяўніку на дом.

Неабходна адзначыць, што ўсе валанцёры прайшлі інструктаж і пастаянна правяраюць тэмпературу. Пры сабе ў іх ёсць сродкі індывідуальнай абароны і дэзінфікуючыя прыналежнасці.

У гэты раз карэспандэнт раённай газеты заспела валанцёраў з ліку малодшага медперсаналу Шаркаўшчынскай ЦРБ Л.І. Рэдзiка, О.О. Туронак і О.Ф. Абрамчык ў кабінеце ўрача агульнай практыкі А.Н. Шашок, дзе малады лекар выпісвала рэцэпты шаркаўчанам.

- Маленькай дапамогі не бывае, - адзначылі валанцёры. - Кожны візіт да пажылога чалавека - вялікі ўклад у барацьбу з каранавiруснай інфекцыяй. Акрамя таго, мы пастаянна нагадваем грамадзянам простыя парады «Як абараніць сябе ад каранавiруснай інфекцыі COVID-19».

Алена Ананіч.