Напярэдадні Дня Кастрычніцкай рэвалюцыі ў Шаркаўшчыне адбылося ўрачыстае адкрыццё пасля рэканструкцыі будынка пажарнай аварыйна-выратавальнай часці №1 раённага аддзела па надзвычайных сітуацыях.

Старшыня Палаты прадстаўнікоў Нацыянальнага сходу Рэспублікі Беларусь, упаўнаважаны Кіраўніка дзяржавы па Віцебскай вобласці Ігар Пятровіч Сергяенка адзначыў, што дзяржава робіць многае для стварэння бяспечных умоў для жыццядзейнасці людзей.

Старшыня Віцебскага аблвыканкама Аляксандр Міхайлавіч Субоцін падкрэсліў, што новы будынак стане сапраўдным упрыгожваннем райцэнтра. Кіраўнік вобласці ўручыў сертыфікат на новы легкавы аўтамабіль калектыву РАНС.

Намеснік міністра па надзвычайных сітуацыях Рэспублікі Беларусь Сяргей Адамавіч Салановіч пажадаў супрацоўнікам Шаркаўшчынскага РАНС годна несці службу, працягваючы слаўныя традыцыі пажарных-ратавальнікаў. У знак падзякі за праведзеную працу ён уручыў юбілейныя медалі "20 гадоў органам і падраздзяленням па надзвычайных сітуацыях Рэспублікі Беларусь" прадстаўнікам праектуючай і будаўнічай арганізацый.

Старшыня райвыканкама Сяргей Генадзевіч Кашміла адзначыў, што новая пажарна-аварыйная выратавальная частка – гэта важны і значны для ўсіх шаркаўчан аб'ект. Ён выказаў падзяку ўсім, хто прымаў удзел у яго будаўніцтве – работнікам таварыства з дадатковай адказнасцю "Вектар-А" на чале з яго дырэктарам Паўлам Уласенкам, кіраўніцтву Міністэрства па надзвычайных сітуацыях і абласнога ўпраўлення МНС. Кіраўнік раёна ўручыў Ганаровую грамату райвыканкама начальніку дзяжурнай змены ПАСЧ № 1 Аляксандру Дземідовічу, падзяку старшыні райвыканкама старэйшаму інжынеру сектара арганізацыі функцыянавання дзяржаўнай сістэмы папярэджання і ліквідацыі надзвычайных сітуацый і грамадзянскай абароны Вячаславу Пецюкевічу і спецыялісту сектара прапаганды і ўзаемадзеяння з грамадскасцю Святлане Райчонак.

Далей намеснік дырэктара ААТ "Вектар-А" Аляксандр Янчанка ўручыў сімвалічны ключ начальніку РАНС Івану Пальчэху. Члены сем'яў пажарных-ратавальнікаў адрасавалі словы падзякі за стварэнне камфортных умоў для працы. Благачынны праваслаўных цэркваў Шаркаўшчынскай акругі, протаіерэй Віктар Валашчук і настаяцель каталіцкай парафіі Узнясенне Святога Крыжа Віктар Сініцкі выканалі абрад асвячэння.

Далей гасцей свята - супрацоўнікаў РАНС, навучэнцаў профільнага класа па кірунку бяспекі жыццядзейнасці, ветэранаў пажарнай службы і жыхароў райцэнтра - чакаў музычны падарунак ад работнікаў культуры.

Член Савета Рэспублікі Нацыянальнага сходу Рэспублікі Беларусь, начальнік Віцебскага абласнога ўпраўлення МНС, Сяргей Мялешкін арганізаваў экскурсію, азнаёміўшы гасцей з матэрыяльна-тэхнічнай базай падраздзялення.

Аляксандр Барыла.