09.08.2020

Сёння мы выбіраем нашу будучыню — выбары Прэзідэнта Рэспублікі Беларусь

Карэспандэнт раённай газеты пабывала на ўчастках для галасавання, размешчаных у г. п. Шаркаўшчына і пацікавілася ў выбаршчыкаў: «Што значаць для вас выбары прэзідэнта Рэспубліка Беларусь?»

Ала Леднік:

- Для мяне выбары - гэта свята. Я заўсёды прыходжу на выбарчы ўчастак як на свята і галасую сэрцам.

Сям'я Хрол:

— У нас сёння святочны настрой. Нас перапаўняюць станоўчыя эмоцыі. На парозе выбарчага участка гучыць жывая музыка, спяваюць артысты Шаркаўшчынскай дзіцячай школы мастацтваў. У фае бойка вядзецца гандаль. На выбары людзі ідуць сем'ямі. Прыходзяць і бабулі з унукамі. Лічым, што кожны павінен прыйсці на выбары. Сёння мы выбіраем будучыню для сябе, нашых дзяцей і ўнукаў. Мы любім Беларусь, мы любім сваю малую радзіму. Ганарымся ўсімі дасягненнямі як краіны, так і нашага рэгіёну ў цэлым.

Анастасія Стрыжнева:

— Сёння я галасую ўпершыню. Прыемна, што на памяць аб гэтай важнай падзеі ў мяне застанецца сімвалічны падарунак, які мне ўручылі на выбарчым участку. На выбарах мы выбіраем будучыню Беларусь. Вось і я ўнесла свой уклад і аддала голас за найбольш годнага, на мой погляд, кандыдата.

Святлана Фоціна з дачкой Міланай:

— На выбары мы спецыяльна прыехалі з іншага горада, каб прагаласаваць па месцы жыхарства і выканаць свой грамадзянскі абавязак. Я галасую, каб нашы дзеці жылі ў мірнай і квітнеючай краіне.

Сям'я Булкіных:

— Мы прыйшлі на выбары ўсёй сям'я. Бо выбары - гэта важны этап у развіцці дзяржавы. Мы галасуем за тое, каб у нашай краіне працягваліся перамены ў лепшы бок, за стабільнасць, сумленнасць і шчырасць перад народам, за захаванне Канстытуцыі і законаў дзяржавы.

— Актыўнасць выбаршчыкаў у нас дастаткова высокая — адзначыў старшыня ўчастковай камісіі №1 Станіслаў Стома. - Працуе таксама выязная камісія па выбарах, бо былі пададзены заяўкі мясцовымі жыхарамі, якія па розных прычынах не маглі прыйсці на выбарчы ўчастак. Ім была прадастаўлена магчымасць прагаласаваць дома.

— Людзі сёння актыўна прыходзяць да нас цэлымі сем'ямі, - адзначыў старшыня выбарчай камісіі ўчастка для галасавання № 2 Іван Лабуць — дарослыя выбаршчыкі прыводзяць з сабой дзяцей, унукаў. На нашым участку выконваюцца ўсе неабходныя супрацьэпідэміялагічныя меры, вокны раскрыты на праветрыванне, праводзіцца дэзінфекцыя, участковая камісія, назіральнікі ўсё ў масках.

Алена Ананіч