04.03.2020

Іван Мацкевіч – лепшы ў сваёй справе!

Старэйшага ўчастковага інспектара інспекцыі па справах непаўналетніх Івана Мацкевіча ведаюць многія шаркаўчане, асабліва школьнікі, падлеткі і іншыя зацікаўленыя асобы. Не злічыць, колькі дакументаў прайшло праз яго рукі, а колькі складаных юных лёсаў... Ды і ці трэба? А вось тое, што па выніках аператыўна-службовай дзейнасці за 2019 год Іван Мацкевіч прызнаны лепшым па прафесіі, мы не маглі пакінуць без увагі. У лютым ён быў узнагароджаны Граматай Упраўлення ўнутраных спраў Віцебскага аблвыканкама, а таксама пераходным прызам «Лепшы супрацоўнік інспекцыі па справах непаўналетніх Віцебскай вобласці».

- Гэтак высокае прызнанне заслуг, безумоўна, не толькі ганарова, але і накладвае вялікую адказнасць, - адзначыў Іван Мацкевіч. Для мяне гэта ўзнагарода - знак дасягненняў і добрых вынікаў працы ўсяго нашага аддзела. Я заўсёды кажу: у нашай працы няма дробязяў, лепш выдаткаваць крыху больш часу і зрабіць усё ўдумліва, пераправерыць інфармацыю, каб нікому не нашкодзіць. Каб зберагчы падлетка ад беды і наставіць на правільны жыццёвы шлях нядбайных бацькоў, інспектару ІСН прыходзіцца прыкладаць парой тытанічныя намаганні, забываючы пра час і асабістыя справы.

Нягледзячы на тое, што Іван малады, складанасцяў у зносінах з падлеткамі ў яго не ўзнікае. На яго думку, супрацоўнік праваахоўных органаў заўсёды павінен быць справядлівым, ведаць і выконваць усе нормы права, быць узорам і сачыць за сваім вонкавым выглядам і паводзінамі не толькі ў грамадскіх месцах, але і паўсюдна.

«Іван Мацкевіч выканаўчы супрацоўнік, не раз ўзнагароджваўся граматамі, у складанай аператыўнай абстаноўцы здольны сам прымаць рашэнні. Працуе з высокай самааддачай, зарэкамендаваў сябе з самага лепшага боку», - так ахарактарызаваў капітана міліцыі намеснік начальніка Шаркаўшчынскага РАУС Андрэй Мікалаевіч Нікалаеў.

Карыстаючыся выпадкам, віншуем героя нашага аповяду і ўвесь калектыў Шаркаўшчынскага РАУС з прафесійным святам - Днём міліцыі!

Алена Ананіч