03.09.2021

Аўтапрабег «Сімвал адзінства» пройдзе  7 верасня ў Шаркаўшчынскім раёне

Аўтапрабег «Сімвал адзінства» прымеркаваны да Года народнага адзінства. Арганізатарам мерапрыемства выступае РГА «Патрыёты Беларусі». Мэта аўтапрабегу - аб'яднанне ў рамках Года і Дня народнага адзінства жыхароў краіны, прадстаўнікоў мясцовых органаў улады, грамадства.

Сімвал акцыі - збожжа ўраджаю 2021 года. У кожным раёне працаўнікі перададуць удзельнікам аўтапрабегу мяшочак збожжа. Затым з сабранага з усіх раёнаў збожжа плануецца спячы вялікі каравай. Аўтапрабег пройдзе з 3 па 15 верасня 2021 года па ўсіх абласцях краіны.

Стартуе мерапрыемства ад мемарыяльнага комплексу «Брэсцкая крэпасць-герой».

7-8 верасня ўдзельнікі аўтапрабегу будуць знаходзіцца ў Віцебскай вобласці.

Шаркаўшчынскі раён будзе сустракаць удзельнікаў аўтапрабегу на чале са старшынёй РГА «Патрыёты Беларусі» Сяргеем Рачкоўскім 7 верасня.

Усе жадаючыя могуць далучыцца да калоны аўтамабіляў на мяжы з Глыбоцкім раёнам. Арыентыровачны час прыбыцця аўтапрабегу на тэрыторыю Шаркаўшчынскага раёна - 11.20.

У 11.45 на плошчы Леніна ў райцэнтры адбудзецца ўрачысты мітынг, ускладанне кветак да воінскага пахавання і перадача эстафеты.

Шаркаўчане ўручаць мяшочак са збожжам новага ўраджаю - сімвалам адзінства - удзельнікам аўтапрабегу. Гэту ганаровую місію выканае першы ў гэтым годзе ў раёне камбайнер-тысячнік Юрый Ардынскi.

Далей удзельнікі аўтапрабегу пройдуць у кірунку Браслаўскага раёна.